როგორც მოგეხსენებათ, ფაბიო კაპელოს წასვლის შემდეგ ინგლისის ნაკრების მთავარი მწვრთნელის პოსტზე დროებით სტიუარტ პირსი მუშაობს. ახალგაზრდა სპეციალისტის თქმით, ის ამ თანამდებობაზე ყოფნას დიდხანს არ აპირებს, უბრალოდ ინგლისის ფეხბურთის ასოციაციას დროის მოგებაში ეხმარება. ბრიტანულმა talkSport-მა გამოკითხვა ჩაატარა, რომელსაც უნდა დაედგინა, თუ ვინ სურთ ინგლისელებს ნაკრების მთავარ მწვრთნელად იმ შემთხვევაში, თუ "ტოტენჰემ ჰოთსბურის” ამჟამინდელი დამრიგებელი ჰარი რედნაპი ფეხბურთის ასოციაციის შეთავაზებაზე უარს განაცხადებს.

ბევრისდა გასაკვირად, გამოკითხულთა უმრავლესობას სურს, რომ პირსმა ნაკრების თავკაცის თანამდებობაზე მუშაობა გააგრძელოს. აღნიშნულ აზრს 38 პროცენტზე მეტი ემხრობა. რეიტინგში მეორე ადგილი მადრიდის "რეალის” მთავარმა მწვრთნელმა ჟოზე მაურინიომ დაიკავა, რომელმაც გამოკითხულთა 21 პროცენტი მოაგროვა, მესამე პოზიცია კი თითქმის 19 პროცენტით გლენ ჰოდლს მიანიჭეს. შეგახსენებთ, რომ 54-წლის სპეციალისტი ინგლისის ნაკრებს უკვე თავკაცობდა და ეს 1996–1999 წლებში ხდებოდა.

გამოკითხვის შედეგად დანარჩენი პოზიციები ასე გადანაწილდა:
4. როი ჰოჯსონი – 6.22%;
5. იან ჰოლოვეი – 4.23%
6. მარტინ ონილი – 3.48%
7. რაფაელ ბენიტესი – 3.36%;
8. ალან პარდიუ – 1.74;
9. არსენ ვენგერი – 1.49%;
10. დევიდ ბექჰემი – 0.88%

ავტორი:  ბექა დოგრაშვილი